ஏற்காட்டில் மழைவாழ் மக்களின் கோரிக்கையை நிறைவேற்றாததை கண்டித்து அரசுக்கு எதிராக கிராம சபை கூட்டத்தில் தீர்மானம்.

ஏற்காட்டில் மழைவாழ் மக்களின் கோரிக்கையை நிறைவேற்றாததை கண்டித்து அரசுக்கு எதிராக கிராம சபை கூட்டத்தில் தீர்மானம் நிறைவேற்ற 18 கிராமத்தை சார்ந்த பொதுமக்கள் முடிவு

சேலம் மாவட்டம் ஏற்காடு மாரமங்கலம் ஊராட்சிக்கு உட்பட்ட செந்திட்டு கிராமத்தில் சாலை வசதி கேட்டு பல கட்ட போராட்டங்கள் 18 கிராமங்களை சார்ந்த் மக்கள் தலைமையில் நடைபெற்று வருகிறது.

 150- ஆண்டுகளுக்கு மேலாக பயன்படுத்தப்பட்டு வந்த சாலையை தார் சாலையாக மாற்ற மாவட்ட நிர்வாகம் நடவடிக்கை எடுக்க வேண்டும் என பல கட்ட போராட்டங்களை நடத்தி வந்த மக்கள் கடந்த வாரம் கொட்டச்சேடு பகுதியில் மறியல் போராட்டத்தில் ஈடுபட்டனர்.

 இருப்பினும் மாவட்ட ஆட்சியர் மற்றும் மாவட்ட நிர்வாகத்தினர் உரிய தலையீடு செய்யவில்லை என குற்றச்சாட்டு எழுந்து வருகிறது. 18 கிராம மக்களின் முக்கிய கோரிக்கையாக மேனாங்குழி முதல் லட்சுமி எஸ்டேட் மற்றும் சேர்வராய்ஸ் ஆறாம் எண் ஃபீல்டு வழியாக கொட்டச்சேடு பகுதிக்கு இணைப்பு சாலை அமைக்க வேண்டும். 2.45 கிலோமீட்டர் தொலைவு உள்ள இந்த சாலையை அமைத்து தர வேண்டும் என பல கட்ட போராட்டங்களை 18 கிராம மக்கள் நடத்தி வருகின்றனர்.

அரசு 18 கிராம மக்களின் கோரிக்கையை ஏற்றால் அங்கு பொதுமக்கள் எளிதில் செல்ல முடியும். குறிப்பாக பல கிலோமீட்டர் தொலைவு சுற்றிவர தேவையில்லை எனவும், அவசர காலங்களிலும் பள்ளி கல்லூரி செல்லும் மாணவர்கள் எளிதில் கொட்டச்சேடு பகுதியை அடைய முடியும் என தெரிவித்துள்ளனர்.

 தொடர்ச்சியாக சேலம் மாவட்ட நிர்வாகம் 18 கிராம மக்களின் கோரிக்கையை ஏற்காமல் ஏழாம் எண் சாலையை அமைக்க முயற்சித்து வருகிறது. அந்த சாலை அமைத்தால் ஒரு கிராம மக்கள் மட்டுமே பயன் பெறுவார்கள். மேலும் தனியார் எஸ்டேட் பாதிக்காது இந்த நிலையை அரசு நிர்வாகம் எடுத்து வருகிறது. குறிப்பாக தனியார் முதலாளிகளுக்கு ஆதரவாக மாவட்ட நிர்வாகம் செயல்படுகிறது என குற்றச்சாட்டு எழுப்பப்பட்டு வருகிறது

 பிரசவ காலங்கள் மற்றும் மருத்துவமனைக்கு செல்ல வேண்டிய தேவை ஏற்படும்பொழுது தற்போது உள்ள சாலையை சுற்றி செல்லும் நேரம் அதிகமாகிறது. பல நேரங்களில் பெண்கள் இறந்துபோகும் சூழ்நிலையும் ஏற்படுகிறது என தெரிவித்தனர். மேலும் மேனாங்குழி முதல் லட்சுமி எஸ்டேட் வழியாக ஆறாம் எண் ஃபீல்டு வழியாக கொட்டச்சேடு சென்றடைய சாலை அமைத்து தர வேண்டும் என தெரிவித்தனர்.

 கடந்த காலங்களை போல் இல்லாமல் தற்போது பள்ளி கல்லூரிக்கு செல்லும் மாணவ மாணவிகளின் எண்ணிக்கை இந்த 18 கிராம மக்களிடம் அதிகம் இருந்து வருகிறது, ஆனால் சரியான சாலை வசதி இல்லாததால் முறையான பேருந்து வசதி இல்லை எனவும், ஆராம் எண் சாலையை அரசு நிர்வாகம் அமைத்து தர வேண்டும், அப்படி தந்தால் எங்களின் கல்வி முன்னேற்றம் அடையும் எனவும் தெரிவித்தனர்.

 சேலம் மாவட்ட ஆட்சியர் தொடர்ந்து பொதுமக்களுக்கு ஆதரவு அளிக்காமல் தனியார் முதலாளிகளுக்கு ஆதரவாக பேசியருவதை கண்டித்து ஜனவரி 26 ஆம் தேதி நடைபெற உள்ள குடியரசு தின விழா கிராம சபை கூட்டத்தில் 18 கிராமங்களிலும் மாவட்ட ஆட்சியரை கண்டித்து தீர்மானம் நிறைவேற்ற ஊர் கூட்டத்தில் முடிவு செய்துள்ளனர்..

 சேலம் மாவட்ட தோட்டத் தொழிலாளர் சங்கம் (சிஐடியு) சார்பில் கொட்டச்சேடு வழித்தடம் சம்பந்தமாக பல கட்ட போராட்டங்களை நடத்தியுள்ளனர், இருப்பினும் இதுவரை மாவட்ட நிர்வாகம் செவி சாய்க்காத நிலையில் கடைந்த 2023ஜனவரி14ஆம் தேதி சென்னை உயர்நீதிமன்றத்தில் ரிட் மனுவை தாக்கல் செய்துள்ளனர். மேலும் மாவட்ட நிர்வாகம் உரிய கவனம் செலுத்தி ஆறாம் எண் பீல்டு சாலையை அமைக்க வேண்டும். ஏழாம் எண் சாலையை அமைக்க கூடாது அதனால் ஒரு கிராமத்திற்கும் தனியார் முதலாளிகளுக்கு மட்டுமே லாபம் ஏற்படும், 18 கிராம மக்கள் பயன்படும் வகையில் ஆறாம் எண் பீல்டு சாலையை அமைக்க வேண்டும் என தொடர்ந்து வலியுறுத்தி வருகின்றனர். நடைபெற்ற ஊர் கூட்டத்தில் சாலைப்போக்குவரத்து சங்க மாநில துணைத்தலைவர் எஸ். கே. தியாகராஜன் பங்கேற்று பேசினார். இதில் செந்திட்டு, அரங்கம், பலாக்காடு உள்ளிட்ட 18 கிராம மக்களின் ஊர் தலைவர்கள் ஊர் கவுண்டர்கள் பொதுமக்கள் உள்ளிட்டு பலர் பங்கேற்றனர்.